謝霆鋒拍賀年廣告勾童年回憶 蔡卓妍考慮與阿嬌再出賀年歌 謝霆鋒、蔡卓妍（阿Sa）、洪嘉豪 及 女團VIVA成員姜咏鑫（Ada）、李晞彤（Carina）、張鈊貽（VALC）等，早前為某銀行拍攝賀年廣告。廣告以「財神」作為核心，將好運與祝福送畀廣大市民，而為配合財神主題，廣告更將經典賀年金曲《財神到》重新編曲作為主題曲，阿Sa、洪嘉豪及三位VIVA成員更以財神造型示人。 鮮有參與賀年企劃嘅謝霆鋒，喺拍攝當日勾起佢童年時代過年嘅回憶：「我小時候不太喜歡影相、過節，坦白說，直到現在我也不太會過節。」因為佢覺得每一日都應該盡力、應該開心咁渡過。至於提到賀年美食，霆鋒就話細個過年時，媽媽狄波拉會通常會整French Toast式年糕，又喜歡煮蝦：「因她覺得過年要哈哈大笑，所以會煮一些類似咕嚕蝦球的菜式。」 霆鋒亦向年輕人分享人生體會，寄語大家要學懂迎接失敗，佢指每個人對成功都有唔同定義，霆鋒指亦唔敢話自己成功，佢只係一直朝着自己嘅目標進發。霆鋒認為世界變化急速，無一套固定嘅方法可以令人更容易達到目標，唯一不變嘅係自己嘅喜好，所以必須搵到真正喜歡嘅事，不過佢亦體會到，失敗從來唔只一次，若對嗰件事唔夠熱愛，就無法承受接踵而來嘅失敗。 曾經扮過多次財神嘅阿Sa，表示每年臨近農曆新年，都會有好多身人問佢同阿嬌會唔會出賀年歌，阿Sa坦言自己都有呢個想法，可以諗諗，至於講到「財神妍」嘅賀年金句，阿Sa大笑分享：「好多年前 TWINS已經創作過一對——『Sa Sa滾，齊齊有錢搵；嬌的的，讀書好成績！』」。 首次以財神造型亮相嘅洪嘉豪，喺鏡頭前豪氣地大灑利是，有型又有氣派，不過佢就笑言知道要扮財神時，內心都有一番掙扎：「起初都有考慮一陣，因為自己都算21世紀其中一個香港型男，擔心穿上財神衫會不夠型，但試完造型後，好多女同事覺得我非常可愛，更加鼓勵我，現場工作人員亦讚不絕口。」佢仲話自己着上呢身造型後，好多人過嚟同佢接觸，仲話掂完佢之後就會發達。至於講到「財神開運技能」，嘉豪真誠表示：「最想為香港帶來好運，自己在香港長大，見到近年香港的運氣不太好。不只是賺大錢，如果運氣好，大家都好。」 嘉豪同樣有份演繹《財神到》，笑言希望大家聽到這首歌時派利是會闊綽、豪爽一點，更自嘲：「做了藝人之後，新年都會派利是，有時派到不太心甘情願，今年穿起這身財神造型，加上唱《財神到》，我會好樂意派利是給同事。」提到傳統習俗，孝順仔嘉豪謂每年臨近新年，都會陪媽媽行花市買花，幫手搬運，又會貼揮春、財神年畫佈置屋企。嘉豪亦發揮創意，創作了他專屬的賀年祝福：「祝大家『洪』運當頭、升職『嘉』人工、『豪』運年年！」 女團VIVA 嘅其中三位成員，換上財神造型喺鏡頭前邊唱《財神到》邊跳「財神舞」，VALC分享道：「我們第一次扮財神，加上慶祝馬年，有機會騎上道具馬拍攝，勾起我小時候騎馬的回憶。」在旁嘅Carina雀躍地表示：「第一次扮財神，寓意今年會發財！」談到各人嘅「財神開運技能」，Carina希望為大家帶嚟至少中一次六合彩頭獎，而Ada則豪氣地表示如果自己係財神，會每一日都會派錢畀身邊人，見人就派。