【明報即時】《愛‧回家》「細力」秦啟維 效力無綫10年宣布離巢 於劇集《新聞女王²》飾演「二奶台Ben」的秦啟維效力無綫10年，昨天（4日）宣布離巢。（秦啟維Ig圖片 / 明報製圖）近日於劇集《新聞女王²》飾演「二奶台Ben」的秦啟維效力無綫10年，昨天（4日）在社交平台發文宣布離巢。秦啟維演藝畢業後加入亞視，效力22年後因亞視不獲續牌，於2015年約滿後轉投無綫，最初擔任TVB娛樂新聞台外景採訪記者，翌年成為《娛樂新聞報道》主播，並開始拍劇，10年來演出過不少劇集，如近年的《愛‧回家之開心速遞》、《金式森林》、《新聞女王²》、《破毒強人》、《美麗戰場》等。他昨天於帖文中表示︰「喺TVB呢10年，拍過60幾部電視劇，係一件非常之難得同埋開心嘅事情，尤其是對於一個咁鍾意演戲嘅人嚟講係非常之有夢想嘅事，當中有《雜警奇兵》嘅細摩sir ，《木棘証人》嘅鍾正英，當然有唔少得嘅就係《愛‧回家之開心速遞》細力呢個角色，係真真正正俾我感受到入屋嘅感覺，所以就算無論你第時喺街見到我叫維維，抑或嘅細力，我都會好開心。」秦啟維續說︰「喺呢度除咗要多謝一班給我機會嘅監製，張志明，林建祥，吳冠宇，梁耀堅，鍾澍佳先生給予我嘅機會，喺度特別多謝丹爺，呢八年同你開工，除咗喺你身上學到演技同專業之外，亦都好感恩你每次開工都會叫我去canteen食飯或者飲咖啡，可能你知道藝員呢份工作唔係咁多收入，成日未食完飯就找咗數，亦都係呢度要多謝咁多位合作嘅TVB台前幕後工作人員，係你哋俾咗機會我拍咗咁多戲，亦都感謝TVB嘅栽培，希望嚟緊可以係多啲唔同嘅平台出現，我喜歡嘅舞台劇，抑或係我未試過嘅電台工作，我相信只要我keep住對演戲嘅熱誠，同埋努力，相信未來一定有好嘅發展 。」（即時娛樂）