娱闻丨陳奕迅談囡囡降臨純屬意外 開明支持康堤勇闖樂壇追夢
.
陳奕迅（Eason）早前完成為期近三年嘅世界巡唱，終於可以放慢腳步嘅Eason，近日一個接受節目專訪，大談同囡囡康堤嘅父女情，仲首次為成為樂壇新人嘅囡囡點評唱功。
Eason喺訪問中承認，康堤嘅出現係佢同太太徐濠縈喺結婚前出現嘅「意外」，自己亦因為呢份突如其來嘅責任而一度不知所措，甚至覺得「有咗個女之後，我發現我係原來唔鍾意小朋友。」因為根本冇辦法同一個BB溝通。反而太太睇落好Cool，實際阿徐先係最鍾意小朋友嘅人。一直到康堤開始識「對話」，呢段父女關係先有變，Eason分享：「直到佢大咗幾歲，開始會同我講句『喂，點呀？』，我先開始真係同佢溝通到，傾到偈。」而到咗康堤，父女間的交流越深，Eason就越嚟越享受呢種對話感覺，仲話囡囡嘅出現：「係一個好嘅意外。」
對於康堤出道成為樂壇新人，Eason就笑言阿徐嘅反應比佢仲驚訝。雖然Eason曾經覺得「要讀埋書先得」，但最後認為成長道路並唔係得一條，唔需要完全複製父母人生軌跡，因此支持囡囡追求音樂夢。康堤曾經亦為Eason嘅歌曲擔任和音，Eason就話：「其實佢把聲真係幾好聽，我就提議不如去錄音室試一試，感受下嗰個experience。」亦係呢份鼓勵令康堤更勇敢踏上音樂路。
不過因為身份，康堤好少向Eason分享出道歌《doll》嘅創作過程中，甚至寧願佢唔好到場觀賞。雖然會感到失落，但Eason尊重囡囡嘅選擇，仲提醒佢要諗清楚，自己係咪真係鍾意喺鏡頭前唱歌，亦以王菲為例，即使被認為「Camera Shy」，依然可以憑自身魅力同實力征服觀眾。Eason雖然話囡囡初登場比自己當年憑《時代曲》出道時「型得多」，但亦鼓勵佢唔好太在意外界評論，千萬唔好太放入心。
