港姐︱陳法蓉讚佳麗質素高 麥美恩對朱文慧情有獨鍾
陳詠詩庄靜璟「峰」頭不再 文雅儀減肥備戰泳裝環節
.
14位港姐佳麗今日（17日）齊集將軍澳電視城拍攝前奏節目，大會邀得4位港姐師姐擔任面試官會見佳麗及給予她們寶貴意見，當中麥美恩與陳法蓉分別就口才及演戲上作指導。
麥美恩表示見到佳麗們，即時憶起自己當年參選：「我當年係9號，個號碼一啲都唔利我，冇一個係我嘅幸運號碼。」她稱留意到海外佳麗及在外國讀書多年的佳麗，語言上較為吃力：「廣東話唔正，或者係潮語跟唔到，明白佢哋比較吃力。」在眾多佳麗中，她特別提到6號朱文慧，她開心謂：「佢講到明話好鍾意我。（因為你巨躉？）佢下身瘦過我好多，佢話鍾意《學是學非》時嘅我，話好少見啲女藝人咁活潑。」她大讚對方敢言又真性情，相當難得，又指不少佳麗對娛樂圈抱有好奇心，這是好事，她會針對性地提供意見。
陳法蓉讚今年佳麗質素高，真人比上鏡靚，問到心水？她坦言：「未見晒，留意到有啲好緊張，行到好似機械人咁。因為唔係泳裝，未睇到身材，只係睇談吐。」她稱見到佳麗們如此緊張，即時想起自己當年面試時，緊張到上唇肌肉不自覺跳動：「好在當年電視未係高清，所以睇唔到。我會鼓勵啲佳麗要對自己有自信，不過驚都係好事，會留意到自己邊度做得唔好而去改善。」
獲麥美恩點名稱讚的朱文慧，則感謝師姐提醒她說話時咬未要清晰，不要只顧住笑，談到她喜歡麥美恩，朱文慧即笑言：「係好鍾意麥美恩，啱啱見完更加鍾意！都好想好似佢咁識搞笑。」
今屆14位候選佳麗昨日（16日）公開晚裝照，當中以「翻版劉佩玥」陳詠詩、「巨胸Vivian」庄靜璟及文雅儀成「峰」頭躉，不過，今日（17日）3人會見面試官時就收起「峰」芒變密實。
陳詠詩表示有看宣傳片，大讚：「大家都好靚，靚咗好多。（之前邊個唔靚？）唔係，經過專業化妝及髮型，出來效果更好。」提到之後有泳裝環節，會如何保持身材？她說：「我向來有操肌，最近會減少肌肉操練，同瞓多啲可以減壓，我平時瞓8個鐘。」她透露已見面試官，對方的評語很正面，又着她放鬆一些，不要給自己太大壓力。
文雅儀被問到如何備戰泳裝環節時，她表示正在減肥：「目標想減4kg。（怕唔怕減咗唔應該減嘅地方？）都唔怕，我有肌肉。」她稱若見到面試官，見面時想跟她們請教演戲：「尤其即場喊，覺得好高級。」而庄靜璟稱有做普拉提保持健美身材，問到會否覺得驕人身材是其優勝之處？她坦承：「係其中一個優點，但女仔最重要有內在美，大家畀時間去留意就知我有乜內在美。」
其中被麥美恩點名的朱文慧，她直言很喜歡麥美恩:「今日見完更加鍾意，想做到好似佢咁，咁搞笑。」她指獲姐提醒，說話時不需要經常笑，最重要咬字清晰。至於莫凡全程表現緊張，步姿僵硬，她透露面試官着她要有自信：「佢哋仲幫我改個名叫莫謙，唔好咁謙虛。」她直言自己超緊張：「經過今日提點，我會反思，我會對鏡行路，希望唔好行到似機械人咁。」對於被指貌似張曦雯，她稱希望不止外表上，將來可以做到對方的成績。
